Policia e Kosovës, përmes komunikatës për media, ka bërë të ditur se gjatë ditës së djeshme se nga disa operacione policore janë arrestuar 14 persona.

“Drejtësia Sot” raporton se të njëjtit dyshohet se janë përfshirë në kryerjen e veprave penale “Pjesëmarrje ose organizim i grupit kriminal të organizuar”, “Kontrabandim me migrantë” dhe “Prodhim dhe përpunim i paautorizuar i narkotikëve”.

Policia bën të ditur se në vazhdën e parandalimit dhe luftimit të krimit, si dhe dukurive tjera negative, përmes departamentit të hetimeve dhe departamentit kufitar ka realizuar disa operacione të suksesshme policore në rajonin e Mitrovicës – Veri dhe të rajonit të Prishtinës.

Kësisoj, nga këto operacione, në tri raste të ndara ka arrestuar 14 persona të dyshuar për përfshirje në vepra të ndryshme penale.

Në rastin e parë, Policia e Kosovës ka arritur që ta arrestoj personin e dyshuar mashkull kosovar me iniciale (M.M.), për kryerje të veprës penale “Pjesëmarrje ose organizim i grupit kriminal të organizuar”. Me vendim të prokurorit kompetent i dyshuari është dërguar në mbajtje.

Kurse lidhur me veprën penale “Kontrabandim me migrantë”, Policia njofton se pas pranimit të informatave për përfshirje të disa personave në aktivitete të kundërligjshme të kontrabandimit me migrantë, pas realizimit të dy operacioneve të mëhershme në muajin korrik të këtij viti ku ishin arrestuar 17 persona të dyshuar dhe ishin identifikuar 11 viktima të kontrabandimit me migrantë, dje ka realizuar operacionin e radhës.

Bazuar në urdhëresën e gjykatës kompetente Sektori i Hetimeve nga Departamenti për Kufi ka realizuar bastisje në pesë lokacione, me ç’rast ka arrestuar 12 persona të dyshuar, prej tyre gjashtë shtetas kosovar dhe gjashtë shtetas të huaj si dhe janë identifikuar 29 viktima të kontrabandimit me migrantë.

Gjatë këtij operacioni në cilësi të provave materiale janë sekuestruar, një veturë, tri armë të gjata dhe tri armë të shkurta. Në konsultim me prokurorin e çështjes i njëjti ka lëshuar vendim për ndalim për shtetasit kosovarë, ndërsa për shtetasit e huaj pritet vendimi pas intervistimit të tyre.

Kurse lidhur me rastin e tretë që ka të bëj me veprën penale të prodhimit dhe përpunimit të paautorizuar të narkotikëve, Policia njofton se me datë 19.10.2022, gjatë mbajtjes së një pike kontrolli ka ndaluar veturën me targa të huaja, ku gjatë kontrollit të realizuar janë gjetur katër qese me substancë narkotike.

Sasia e narkotikëve dyshohet të jetë e llojit marihuanë me peshë prej 35gram. Në konsultim me Gjyqtarin e Procedurës Paraprake është marrë urdhër verbal për bastisje në shtëpinë dhe objektet përcjellëse të të dyshuarit mashkull kosovar.

Raportohet se gjatë bastisjes janë gjetur dhe konfiskuar dëshmitë në vijim: Një pistoletë me karikator, gjashtë fishekë, sasi e dyshuar e marihuanës me peshë rreth 708 gram, sasi e dyshuar e marihuanës me peshë rreth 902 gram, sasi e dyshuar e marihuanë me peshë rreth 163 gram (gjithsej 1.8kg substancë narkotike e llojit marihuanë), vetura e përfshirë në rast, një telefon mobil si dhe 6 bimë të mbjellura të dyshuara të llojit Kanabis.

Ne lidhje me rastin është njoftuar prokurori i kompetent i cili ndaj të dyshuarit ka lëshuar vendimin për ndalim policor prej 48 orësh.