Prokuroria ka parashtruar kërkesë për caktimin e masës së paraburgimit ndaj dy personave të tjerë që dyshohet se dhunuan të miturën njëmbëdhjetë vjeçare.

Lajmin për “Drejtësia Sot” e ka konfirmuar Laureta Ulaj, zyrtare për informim publik pranë Prokurorisë Themelore në Prishtinë.

Sipas Ulajt, kërkesa për caktimin e paraburgimit ndaj dy  të dyshuarve të tjerë i është paraqitur sot Gjykatës Themelore në Prishtinë.

Ndryshe, të hënën, kjo Gjykatë ka caktuar masën e paraburgimit ndaj dy të dyshuarve të tjerë për dhunimin e të miturës.

Kurse, Policia e Kosovës ka njoftuar se   gjatë ditës së djeshme është identifikuar edhe i dyshuari i pestë, për të cilin policia është ende në kërkim.

Në bazë të raportit të Policisë së Kosovës, dyshohet se e mitura njëmbëdhjetë vjeçare është dhunuar ditën e shtunë, në Prishtinë, ndërsa në kryerjen e kësaj vepre penale thuhet se kanë marrë pjesë pesë persona.

“Drejtësia   Sot”   po   raporton   në   vazhdimësi   lidhur   me   këtë   rast,   link: https://www.rolpik.org/dhunimi-i-njembedhjete-vjecares-policia-jep-detaje-per-tre-te-dyshuarit-e-tjere/